"Avuçımda küz küneşi…"

Nice şair altın küz mevsiminden ilham alıp, öz tesirli, felsefiy satırlarını tizgen, öz oquyıcılarınıñ yürek tellerini sızlatqandır. Altın küzniñ küneşi de yıltıray, de tüşünceli, eyecanlandıra… Bir kün biz onı avuçımızda saqlamaq istedik…  Lirik müitten, dostane subetten göñülce isinmek istedik. İcadiy tedbirimizni keçirmek içün, milliy eşyalarımıznıñ taqımını toplağan Ayder Halilovnıñ elinden meydanğa ketirilgen, çeber qollarnen donatılğan azbarçıqqa malik, öz odalarında Qırımnıñ eski tüsüni ve zemaneviy tasvir sanatını taqdim etken "Zolaman" müzeyi bizge nasip oldı. Ayder ağanıñ müzeyinde musafir olıp, "Fikirdeşim" icadiy birleşmeniñ teşebbüsinen "Avuçımda küz küneşi…" adında şiiriy-muzıkalı tedbirni keçirmege qarar aldıq.

Oktâbrniñ 27-sinde tedbirimizni ötkerdik. Etrafımızdaki, halqımıznıñ büyük istidatları ressam Asan Baraşnıñ özgün, felsefiy resimleri em de, rafçıqlarda turğan, kirametçiler Şamil İlyasov ve Abdül Seit-Ametovnıñ eserleri, şübesiz, tedbirimizniñ müitine ayrıca bir keyfiyetler qoştılar ve teessuratlarnı daa da küçleştirdiler. Kerçek söylesek, bizler böyle körüşüvlerimiz (belki, şimdi siyrekçe keçirilgeni sebebindendir), dersiñ, biri-birini sağınğan dostlarnıñ rastkelişine çevirilip ketkenini esledik. Bu sefer de öyle oldı. Mikrofon ögüne çıqıp, Mayye Safet, Emine Üsein, Seyran İbraim, Elmaz Bahşış, Dinara Aci ve Seyare Kökçe öz şiirlerini oqudılar. Er bir şair öz üslübinde, öz ritminde, özüne has ğayreti ile zalnı todurğan diñleyici musafirlernen öz duyğu-fikirlerini paylaştı. Seyran bey, öz çıqışını başlamazdan evel, belli ressam ve şair Rustem Eminovtan selâm olğan, mezkür tedbirge bağışlanğan, şiirini oqudı.

Bu körüşüvni üç dal-fidan boylu, bülbül sesli, dülber yaş yırcı hanımlar – Feride Asanova, Fatma Cappar ve Emine Mustafayeva yaraştırdılar. Olarnıñ çıqışları eski devirlerge alıp barıp, bugünden kelecekke, şırnıqlı bir özençik kibi, uzandı. Yırcılarımız em ayrı-ayrı çıqış yaptı, em de üçevleşip, yırlap, musafirlerimizniñ yürek tellerini teprettiler.

Episi bular – müzeyde taqdim olunğan sanat eserleri, qıntavlı azbarçıq, nazmiyet ve türküler küzniñ altın mevsiminen pek uyğunlaştılar. Tedbirden soñra, azbarçıqta, adet olğan qaveler de içildi, laqırdı-qonuşuv yüz berdi. Avuçımızdaki küneş bu küzniñ sıcaq ve aydın bir hatırasına çevirilecek…

İcadiy körüşüvni keçirmekte ğayeviy qoltutuv köstergen "Avdet" gazetası, yardım etken "ERA" fotostudiyası, musafirçen "Zolaman" müzeyi, episi iştirakçı ve seyircilerimizge "Fikirdeşim" icadiy birleşmeniñ adından samimiy teşekkürler bildiremiz.

"Fikirdeşim"